終於睇完一場雖然醜陋艱苦但獲勝嘅比賽，就得閑無事同各個球員評下分。
易建聯：7.5分，食咗咁多炒粉之後，第四節終於甦醒，尤其係處于關鍵時候攻防兩端都打出咗一個球隊一哥應有嘅表現，但鑒於三分8中1，所以上唔到八分，唔好意思，就因為你係球隊一哥，所以我個人會對你有更高要求。如果你三分好些少，球隊可能唔使贏得咁驚險。
尼高遜：9分，今場典型全能戰士，內線強攻，外線遠射，籃板，助攻，偷波，蓋帽全齊，有可能會係一個後生加強版迪奧古，就今場比賽而言，無太多嘢可以挑剔。
趙睿：8分，幾個突破鏟籃幾靚下，防守時夠勤力，關鍵時有偷波有助攻。令到阿飛整咗個少有咁強硬嘅IN YOUR FACE鋤樽。但由於罰波同三分表現不佳，所以八分比較適合，因為個人更希望你唔止係一把刀，更加要成為一枝槍。所以原地跳射，急停中遠距離射波，高強度防守之下CATCH AND SHOT三分等訓練項目，要每日至少練幾百個，朱芳雨，畢比，西熱里江，米拿就係你榜樣。要想令自己到更高層次，唯有苦練。
楊金蒙：7.5分，作為今晚一個正選球員，關鍵時老友一直將佢放上場，佢亦都證明咗自己關鍵時刻唔手軟，雖然入波唔多，但都係關鍵波，第一個三分，令到宏遠打咗個進攻高潮，第二個三分更加關鍵，幫宏遠吊命，令到宏遠重新將贏波機會把握係自己手中。如果最後兩罰皆中，至少八分。
周鵬：5分，三分全炒，罰波六中二，上場近33分鐘就只得8分，作為一個老將，球隊隊長，表現唔應該如此之差，或者係表現會有起伏，但如果要成為一個明星球員，就應該比其他球員更加識得自我調節。所以周隊係一個好球員，但離明星，仲係有距離，因為仲神經刀過神經刀。
任駿飛：7分，就憑喺有限嘅上場時間入邊，都可以關鍵時候堅挺咗下，喺前後都有防守球員時敢于雙手鋤樽，尼七分值得，因為換咗其他球員，有可能已經嚇窒咗，就算唔手軟，都有可能只係放籃，噉就容易畀人BLOCK，原以為你就得靈巧，原蒞你都硬得起，希望你以後一直硬落去，而且越蒞越硬，所以私人醒多你一分。
邵英倫：4分，除咗犯規無乜表現，唯一一次得分機會你自己都牛油手失咗。
莊遜：7分，唔知會唔會高咗啲，三分皆失，兩分尚可，領先時一次唔冷靜行為，導致宏遠畀對方一個ROUND追平，但追分階段時又有關鍵上籃，助攻阿聯得分，對富蘭克林嗰波防守尤其重要，可以講係直接令到四川絕望。
結語：希望各位球員，尤其係球隊大佬，隊長，鬼仔，落力練多啲罰波，三分，唔好再喂驚風散畀各位忠實擁躉食。