千百年世前，温州有条街，日日夜地会有马趞起个声音，但是周边个老百姓从来就冇眙着过马。居条街里，有个卖草鞋个老老头，渠啦门口头儿有一粒石头。打草鞋能届，老老头逮鞋草囥啊石头上面捶捶软。石头是青色个，匄个老老头捶爻光溜溜，可以当镜影罢。
有一日，一个行路过人眙着居粒石头。个人眙爻亦眙，摸爻亦摸，喜欢显喜欢。渠伉老老头讲：“阿公，你居粒石头卖匄吾爻，用着伐？”
老老头接应：“个是吾饭保儿，吾不卖个。”
行路过人讲：“吾银子多匄俫你哪。”
老老头问：“你最多出几俫爻？”
行路过人讲：“吾出五两银子。”
老老头呆一呆，头衅两衅讲：“粒石头吾用长久爻罢，有感情个，吾舍不得卖。”
个人走爻以后，边厢眙闹热个沃讲：“老老，你憨爻罢！五两银子买你一粒石岩橛，妆乜还不卖？”
个老老头，沃不响，随别人讲。讲句实话，渠也匄头先个人听阂牢，觉着个人真是过里过怪，用恁多个银子买粒石头橛。
黄昏，老老头伉老老娘儿讲起个事干。老老娘儿听爻以后，讲：“妆紧！老老，逮石头掇底快。恁值铜钱，匄人偷爻冇解。”个两老就做对逮石头抬啊间里爻。
三天过，许个行路过人亦走来买石头。居日，渠银子多带来俫罢。个人冇眙着石头，就慌起道罢。
渠问老老头：“阿公，石头呢？”
老老头接应：“吾揹底爻罢。”
“你揹底几日罢？”行路过人问。
老老头讲：“三日罢。”
行路过人讲：“石头匄你眙眙快。”
行路过人眙过石头以后，讲：“咳！届届，你就白白送匄吾，吾也覅渠罢。伉你讲实话，吾是个采宝客。你居粒石头底面有五头宝马。居五头马是活个，夜地趞出嬉，日地趞底转。石头囥外面，马日日有露水呷；你宿石头上面捶草，马日日有草吃。届，你逮石头揹啊底爻，五头马冇吃冇呷，肯定死爻罢。”
采宝客逮石头反啊转，石头上面真真有五头马个影，就是不会动爻罢。
听着个人沃逮个老老头可惜，讲渠个人运蟊，匄鸡咄也覅渠咄。
还好，个老老头冇逮俫当起事干。渠想：“马不动爻罢，石头还是一色个。匄吾捶捶鞋草，渠还是一个宝。”
老老头，版版六十四，还是日日卖草鞋，日日捶鞋草，平平淡淡过日子。
老老头住个居条街，后来就叫做“五马街”。